Qırımtatar faali Nariman İbraimovğa iyül ayında Moskvada keçirilgen aktsiyalar sebebinden berilgen para cezasını ödemek içün «Qırım marafonı» aktsiyası çerçivesinde 20 000 ruble (7450 ğrıvnâ – QA) toplandı. Bu aqta «Qırım birdemligi» cemaat birleşmesi Facebookta haber ete.
«2019 senesi noyabrniñ 28-nde Bağçasaray şeerinde «Qırım marafonınıñ» parasınen Nariman İbraimovnıñ 20 000 ruble miqdarında para cezası ödeldi», – dep aytıla haberde.
Oktâbrniñ soñunda belli olğanı kibi, iyül ayında Moskvada aktsiya keçirgen qırımtatar faalleriniñ para cezalarını ödemek içün «Qırım marafonı» çerçivesinde 1 161 000 ruble toplandı.
«Qırım birdemligi» birleşmesiniñ koordinatorlarından biri Server Çolakçikniñ aytqanına köre, «Qırım marafonında» yarımada sakinlerinden ğayrı, Türkiye, ABD ve Avropadan insanlar iştirak etti.
İyülniñ 11-nde Moskvada Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre. Rusiye mahkemesi olarğa para cezalarını berdi.
İyülniñ 10-nda Moskvanıñ Qızıl meydanında narazılıq aktsiyasında iştirak etken yedi qırımtatar faali tutulıp, Kitay-gorod politsiya bölügine alıp ketirildi. Rusiye aq qorçalayıcısı Aleksandra Krılenkovanıñ aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev tutulğan edi. Yedisini de miting keçirüv tertibini (Rusiye Memuriy cinayetler kodeksiniñ 20.2 maddesi) bozğanında qabaatladılar.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
