Kreml kontrolindeki Qırım Yuqarı mahkemesinde aprelniñ 17-nde «yaltalı yaqıcılar davasınıñ» temyiz talabı baqıldı. Qadı İrina Rıjkova temyiz talabını qanaatlendirip, ükümni lâğu etmege ve davanı Yalta şeer mahkemesine qaytarmağa qarar aldı. Bu aqta «Krımskiy protsess» («Qırım esnası») teşebbüsiniñ Facebook saifesinde haber etile.
Mahkeme vaqtında mahkümler olarnı qabaatlarını tanımalarını mecbur etmek içün işkencege oğratqanlar, dep bildirdi.
Qırım faalleri mabüslerden biri Muyedin Alivapovnıñ davasını Qırım mevzusında Ukrainağa qoltutqanını ve qırımtatarlarğa qarşı yapılğan repressiyalarnen bağlı fikrini açıq bildirgen qardaşınıñ faaliyetinen bağlağan edi.
Yanvarniñ 23-nde Alupkada 21 yaşında qırımtatarı Muyedin Alivapov tutulğan edi. Onı daa eki kişinen beraber Qırımnıñ cenübiy yalısında maşinalarnı tutandırğanlarında qabaatladılar.
2018 senesi yanvar ayında Rusiye kontrolindeki Qırım mahkemesi Muyedin Alivapovnı 4,6 yıl yaşav tarzı koloniyasında, Sergey Kudrâşovnı 3 yıl yaşav tarzı koloniyasında, Vâçeslav Butnikni ise 2,5 yıl yaşav tarzı koloniyasında qalmasına üküm etti. Mahküm etilgenler ükümni temyiz etti, faqat Qırımnıñ Yuqarı mahkemesi onı deñiştirmegen edi.
