Kreml nezaretindeki Aqmescitniñ Kiyev rayon mahkemesi «Veciye Kaşka davasınıñ» mabüsi Bekir Degermencige dava malümatlarını ögrenüv müddetini oktâbrniñ 23-ne qadar sıñırladı, dep bildire Qırım.Aqiqat mühibiri.
Tahqiqatçı Sergey Pogorelovnıñ malümatına köre, dava iştirakçilerinden er biriniñ malümatlarnen tanışma müddetleriniñ sıñırlanması boyunca mahkemege muracaatlar berildi. Qırım.Aqiqat mühbiri bildire ki, tahqiqatçınıñ fikirince, advokatlar «tanışuv esnasını soza».
«Esnasnıñ diger iştirakçileri, hususan – zarar körgenler, diger qabaatlanğanlar, haberdar etilmegenini, tahqiqatçı dava malümatlarınen tanışmağa başlamağa imkân bermegenini aytsaq da, tahqiqatçı vaqtımıznı oktâbrniñ 15-ne qadar sıñırlamağa endi rica etken eken. Qadı bizge biraz daa vaqıt berdi, oktâbrniñ 23-ne qadar. Bu künge qadar malümatnı ögrenip, muracaatlarnı azırlamaq kerekmiz», – dedi advokat Edem Semedlâyev.
Bundan evel advokat Edem Semedlâyev mabüsni izolâtorda ziyaret etip, Aqmescit SİZOsında «Veciye Kaşka davasınıñ» iştirakçisi Bekir Degermenciniñ alı fenalaştı, dep bildirgen edi.
2017 senesi noyabrniñ 23-nde Aqmescitte Rusiye telükesizlik hadimleri – Kâzim Ametov, Asan Çapuh, Ruslan Trubaç ve Bekir Degermenci kibi bir gruppa qırımtatarnı tutıp aldı. Olar Türkiye vatandaşı Yusuf Aytandan para talap etüvde şeklene. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra qadın vefat ete.
Bekir Degermenci astma hastasıdır, onıñ alı SİZOda ağırlaştı. Qırım Yuqarı mahkemesine «ilk yardım» çağırılğan edi.
Dekabrniñ 14-ne keçer gecesinde o, reanimatsiyağa tüşti, bundan soñ onı pulmonologiya bölügine keçirdiler. 2018 senesi yanvar 2-de onı kene SİZOğa avuştırdılar.
Qırımtatar faali Asan Çapuh SİZOda mikroinsult keçirdi ve acele sürette hastahanege yatqızılmaq kerek edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
