Kreml nezareti altındaki Qırım Yuqarı mahkemesi, “Hizb ut-Tahrir davası”nıñ ekinci Bağçasaray taqımınıñ mabüsi Timur İbragimovnıñ tevfiq appelâtsiyasını lâğu etti, o 2019 senesi fevral 9-ğace apishanede qaldırılacaq.
Mahkeme oturışı qapalı şekilde keçirildi dep bildire “Qırım birdemligi” birleşmesi öz Facebook saifesinde.
Bir kün evel Qırım Yuqarı mahkemesi,“Hizb ut-Tahrir davası”nıñ ekinci Bağçasaray taqımınıñ mabüsi Ernes Ametovnıñ tevfiq appelâtsiyasını lâğu etip, onı fevral 9-ınace nezaret altında qaldırdı.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
