Kreml kontrolindeki Qırımnıñ Aqmescit rayon mahkemesi vefat etken qırımtatar milliy areketiniñ veteranı Veciye Kaşkanıñ qorantası ögünde borcunı ödetüv vatandaş davasınıñ cevapkârı olğan Türkiye vatandaşı Yusuf Aytanğa borcunı ödetüv qararını yañıdan baqacaq. Bu aqta Qırım.Aqiqat mühbiri haber ete.
Bundan evel bu mahkeme Veciye Kaşkanıñ torunı Aliyeniñ Aytanğa qarşı borc ödetüvinen bağlı davasında ğıyabiy şekilde onıñ tarafını tutqan edi.
Bugün qadı Anna Timofeyeva mahkeme qararını lâğu etti, çünki cevapkâr olğan kişi bu mahkeme aqqında bilmegen eken.
«Aytan vatandaş davası boyunca mahkeme oturışuvları keçirilgeninden haberi olmağanını bildirdi, asılında ise mahkeme apparatınen telefon vastasınen bir qaç kere bağlanğan edi, em de qayd olğan yerini bildirgen edi. Bunıñnen beraber, "Veciye Kaşka davasınıñ» ükmüne köre, senetni maneviy ve fizik basqı altında berdi, dep ayttı», – dep tarif etti Aliye Kaşkanıñ advokatı Mammet Mambetov.
İmayeci, Yusuf Aytanğa qarşı vatandaş davası boyunca qararnıñ lâğu etilüvini yaqın vaqıtta Qırım Yuqarı mahkemesinde «Veciye Kaşka davasınıñ» mabüsleri bergen temyiz arizalarınıñ baqıluvınen bağlay. Ve mahkemede Aytannıñ borc alğanınıñ isbatlanması – «ükümniñ ğayrıdan baqılması içün ciddiy bir sebeptir».
«Cinaiy dava boyunca advokatlarnıñ ve mabüslerniñ temyiz arizaları bar. Temyiz arizasınıñ temelinde Aytannıñ borclu olğanını tanığan qarar mevcut. Elbette, qabaatlayıcı tarafqa bu kerekmey. Şu sebepten temyiz arizalarınıñ baqılması ögüne qarar lâğu etile ve davanıñ esası tekrar baqılacaq, dep qarar çıqarıla», – dedi Mambetov.
Vatandaş davasınıñ yañı baqıluvı iyünniñ 18-ne belgilendi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Rusiye devlet qabaatlavı «Veciye Kaşka davasınıñ» mabüsleri içün şartlı apis cezaları berilmesini istedi. «Qırım birdemligi» cemaat birleşmesiniñ bildirgenine köre, Rusiye prokuraturası Asan Çapuhnı üç buçuq yılğa, Bekir Degermenci, Kazim Ametov ve Ruslan Trubaçnı üç yılğa üküm etmege talap ete, er birine üç yıl sınav müddeti berile bile.
Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
