Avgustnıñ 8-inde Kreml nezaretindeki Qırım Yuqarı mahkemesi, qırımtatar faali Edem Bekirovnıñ apis müddetini 2019 senesi oktâbr 11-inece uzattı.
Bu hususta Qırım.Aqiqatqa advokat aleksey Ladin aytıp berdi.
"Bu qarar sadece qanunsız ve temelsiz degil, o cinaiy esnasınıñ iç bir printsipine lâyıq degil: ne insaniyetlik, ne qanuniylik, ne adaletlilik. Maña köründi, sanki qararnı evelden çıqardılar. Mahkeme qararında, ev tevqifi aqqında imayeniñ iç bir delilini eşitmedim, amma oturış vaqtında olar aytıldı", - dep aytıp berdi Ladin.
Advokat, müşterisiniñ tevaif uzatılmasına apellâtsiyanı red etseler, facialı neticeler ola bile, dep saya.
"Er şey yaramay çezile bile. Tevqif müddetiniñ uzatılmasına apellâtsiyamnı red etseler ve davanı Krasnoperekopsk rayon mahkemesine yollasalar, Bekirovnı açlıqnı başlaycaq, ve bütün bular tez ve facialı bitecek", - dep añlattı o.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye quvetçileri tarafından tutıldı. O, 78 anasını ve aqrabalarını ziyaret etmek içün Qırımğa kete edi.
Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
