Kreml kontrolindeki Qırım Yuqarı mahkemesi Bağçasaraydaki ekinci «Hizb ut-Tahrir davası» boyunca qabaatlanğan «Qırım birdemligi» cemaat birleşmesiniñ koordinatorı, vatandaş jurnalisti Server Mustafayevniñ SİZOda bulunuv müddetiniñ uzatılmasını qanunğa uyğun dep tanıdı, dep bildire Qırım.Aqiqat mühbiri.
Advokat Lilâ Gemeciniñ aytqanına köre, oturışuv qapalı şekilde keçirildi, «bir çoq bozuv oldı».
Gemeciniñ qayd etkenine köre, mahkeme imayeniñ Aqmescit Kiyev rayon mahkemesiniñ aprelniñ 5-nde çıqarğan qararına qarşı temyiz arizasını baqtı, aynı vaqıtta, fevralniñ 6-nda nezaret altında tutuv müddetini uzatmaq qararına Yuqarı mahkeme qulaq asmayıp, onı alâ daa baqmadı.
Advokatnıñ bildirgenine köre, mahkeme esnas iştirakçileriniñ telükesizligini temin etmek içün onı qapalı yaptı. Gemeci esnasnı qapatmayıp, telükesizlikni başqa bir usulnen temin etmege rica etti.
«Qadılar bunıñ içün salonğa qaç vekil kirsetilecegini soradı – 10 ya da 100 insan? Ve kimniñ menfaatları içün muracaat bergenime qarar almağa ayttılar, çünki ne mahkeme, ne de prokuror içün bir telüke yoq. Bizler bu mahkemeniñ aytqanları ve özümiz de bu qararnı añlamağa tırışamız, dep ayttıq, muracaatnı ise mahkemenıñ açıq olmasını temin etmek içün müvekkilimniñ menfaatları içün berem», – dep añlattı imayeci.
Gemeciniñ qayd etkenine köre, bu oturışuvda mahkeme qararı ğayet müim ola, çünki imayeniñ Qırımdaki «Hizb ut-Tahrir davalarınıñ» qapalı mahkeme oturışuvları ile küreş buña bağlı.
«Dialogımız oturışuv protokolına kirsetilse, bugün niayet mahkemeniñ izaatını alacaqmız, mahkeme esnasınıñ iştirakçileri içün bir telüke yoq, mahkeme bu ibareni esnasnı qapatmaq içün qullana. İnsanlar mahkeme esnasınıñ ketişatını taqip etip olamasın ve qabaatlanğanlarğa qoltutmasın dep», – dedi advokat.
Gemeci bütün muracaatlarda mahkemede qabaatlayıcı tarafqa qoltuttı, dep bildirdi. Prokurornıñ iç bir delili yoq edi, imayeniñ «birinci instantsiya mahkemesiniñ açıq oluv printsipi, qanunnıñ yañlış izaatlanması, tahqiqatnıñ sebepsiz muracaatı» delillerine qulaq asmadı.
Server Mustafayev 2019 senesi iyünniñ 9-na qadar SİZOda qalacaq.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
