Aqmescitteki Kiyev rayon mahkemesiniñ qadısı Anton Tsıkurenko dekabrniñ 10-nda advokat Emil Kurbedinovnı müddetinden evel azat etmemege qarar aldı, dep bildire Qırım.Aqiqat mühbiri.
Advokat Edem Semedlâyevniñ aytqanına köre, Kurbedinov «Hizb ut-Tahrir davasınıñ» mabüsi Enver Mamutovnıñ menfaatlarını qorçalamaq içün Rusiyeniñ Rostov-na-Donudaki Şimaliy-Kavkaz okrugınıñ arbiy mahkemesinde olmaq kerek, şu sebepten ariza berildi.
Qırım uquqçısı Lilâ Gemeci qadınıñ diqqatını mahkeme qararına qarşı berilgen itiraz arizası vaqtında baqılmağanına celp etip, em Kurbedinovnıñ, em imayesi altında insanlarnıñ aqları bozulğanını qayd etti.
Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kurbedinovnı 5 künge tevqif etti. Onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden apiske aldılar. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Emil Kürbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.
Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
