Link açıqlığı

Saatnıñ esas haberi

Qırım mahkemesi «Hizb ut-Tahrir davasınıñ» mabüsi Seyran Saliyevniñ ömür arqadaşına aqayınen körüşmesine izin bermedi


Seyran Saliyevniñ ömür arqadaşı Mumine
Seyran Saliyevniñ ömür arqadaşı Mumine

Kreml kontrolindeki Qırım Yuqarı mahkemesi Bağçasaraydaki ekinci «Hizb ut-Tahrir davasınıñ» mabüsi Seyran Saliyevniñ ömür arqadaşınıñ şikâyet arizasını red etip, keçken mahkemeniñ aqayınen körüştirmemek qararını deñiştirmedi. Bu aqta «Qırım birdemligi» cemaat birleşmesi haber ete.

Mumine Saliyeva diñlevlerde söz alıp, Kiyev rayon mahkemesi (şikâyetniñ daa evel baqılğan yeri) dava malümatlarını ögrenmedi, dep bildirdi.

«O, körüşüv redini aqayı ve qorantalarına yapılğan maneviy basqı ve bunı işbu davanıñ siyasiy sebepleri bar olğanına dair alâmetler dep saya», – dep aytıla haberde.

Rusiye qanunı körüşüvlerge izin berse de, «Hizb ut-Tahrir davası» boyunca apiske alınğanlarnıñ tuvğanları SİZOda körüşüvge ruhset berilmesini talap etmege mecbur.

Qırımlı advokatlar bunı apiske alınğan soy-soplarına qoltutqan qorantalarğa basqı vastaları olaraq köre.

2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG