Kreml kontrolindeki Aqmescit Kiyev rayon mahkemesi iyünniñ 3-nde Qurmandaki «Hizb ut-Tahrir davasınıñ» üç mabüsi Arsen Abhairov, Rustem Emirüseinov ve Eskender Abdulganiyevge qarşı cinaiy dava açılğanını qanunğa uyğun dep tanıdı. Bu aqta Arsen Abhairovnıñ advokatı Edem Semedlâyev Qırım.Aqiqat mühbirine bildirdi.
Bu dava mabüsleriniñ imayesi Qırımdaki Rusiye FSBsiniñ idare tahqiqatçısı Sergey Mahnevniñ cinaiy dava açmaq qararına qarşı şikâyet arizasını bergen edi.
«Bizler (imaye – QA) tahqiqatçı Mahnev Qurmandaki «Hizb ut-Tahrir davasınıñ» mabüsleri olğan üç qırımtatarı, musulmanğa qarşı cinaiy dava açmaq qararını qanunsız bir şekilde çıqardı, dep tüşünemiz. Onıñ areketlerini mahkemede şikâyet ettik», – dedi advokat.
Mahkeme imayeniñ şikâyetini red etip, tahqiqatçınıñ areketlerini qanunğa uyğun dep tanıdı.
«Öz delillerimizde bizler dörtünci Jeneva konventsiyasına esaslanamız, anda Qırımda işğal olğanı içün Ukraina qanunları qullanılmalı, dep aytıla. Bilgenimiz kibi, Ukrainada «Hizb ut-Tahrir» teşkilâtı yasaq etilmey. Mabüsler Ukraina vatandaşları olğanını ayta. Qadı, ne yazıq ki, delillerimizge emiyet bermedi ve şikâyetimizni qanaatlendirmedi. Amma biz bu qararnı da yuqarı qurulışlarda şikâyet etecekmiz», – dep qoştı Edem Semedlâyev.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Fevralniñ 15-nde Kreml kontrolindeki Kiyev rayon mahkemesi olarnı tevqif etti. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
