Kreml nezaretindeki Qırım Yuqarı mahkemesi, Bağçasaray "Hizb ut-Tahrir davası"nıñ beş iştirakçisiniñ apis müddetini uzattı. Qararğa köre, Server Mustafayev, Server Zekiryayev, Edem Smailov, Memet Belâlov, Marlen Asanov daa 30 kün SİZOda tutulacaq. Bu aqta "Qırım birdemligi" cemiyet teşkilâtı bildirmekte.
Faallerniñ malümatına köre, oturış qapalı şekilde keçirilgen edi.
"Bugün müşterim Memet Belâlovğa nevbetteki sefer sıñırlayıcı tedbirler uzatıldı. Bu sefer uzatma muracaatınen tahqiqatçı degil, prokuror çıqtı. O, qabatlayıcı ükümni imzalap ve vesiqalarnı Rostov şeeriniñ Şimaliy Kavkaz bölge arbiy mahkemesine yollap yetiştirmegenleri içün bunı yapqanlarını añlattı", - dep aytıp berdi Edem Semedlâyev.
Daa bir advokat Lilâ Gemeci, prokuror, onıñ müşterisi Server Mustafayev sanki şaatlarnı qorquta, özü saqlana ya da "tahqiqatqa başqa türlü mania ete bilgeni" içün sıñırlayıcı tedbirni uzattı, dep aytıp berdi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
