Rusiye nezaretindeki Qırım Yuqarı mahkemesi, “Hizb ut-Tahrir davası” ekinci Bağçasaray taqımınıñ iştirakçisi Marlen Asanovnıñ, sıñırlayıcı tedbir olaraq SİZOda tutulmasına şikâyetini red etti dep bildire Qırım.Aqiqat mühbiri.
Böylece, Asanov 2019 senesi fevral 9-ınace apiste tutılacaq. Advokat Emil Kurbedinov, sıñırlav tedbirini ev tevqifine deñiştirmege muracaat ete edi. Prokuror buña qarşı çıqtı, çünki, onıñca, Asanov tahqiqattan gizlene, şaatlarğa tesir ete, delillerni yoq ete bile. Oturış qapalı şekilde keçirildi.
Asanov oturışta SİZOdan video bağ ile iştirak etti. Soylarına qarar ilân etilüvine kirmege razı oldılar. Apayı Ayşe Asanovanıñ aytqanına köre, onıñ alı bir coruq.
“O mında 25 yıl yaşağanını, evi mında olğanını ve iç bir yerge qaçmağa niyeti olmağanını ayttı. Yasaqlanğan bir şey yapmağanını ayttı. Ve o cinayetçi olsa edi, er mahkeme oturışına kelgen adamlar olmaz edi”, - dep ikâye etti Ayşe Asanova.
2017 senesi oktâbr ayında Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
