Sentâbrniñ 2-nde Rusiyeniñ nezaretinde olğan Aqmescit şeeriniñ Kiyev rayon mahkemesi Ukrayina istihbaratınıñ malümatına köre, Rusiye arbiyleri tarafından Herson vilâyetinde tutıp esir etilgen qırımtatar Ayder Ümerovnı 5 yıl sert apis cezasına mahküm etken.
Rusiye haber vastaları RF FSB-niñ matbuat hızmetine atfı etip, Rusiye mahkemesi Rusiyede yasaq etilgen "Noman Çelebicihan batalyonı"nıñ "azası" mahküm etilgenini bildire.
Rusiye mahsus hızmetleriniñ malümatına köre, "yarımadanıñ ğıda blokadası"nda iştirak etken 1991 senesi doğma Ukrayina vatandaşı mahküm etilgen. Rusiye FSB erkekni 2022 senesi aprel ayında "Qırımğa qanunsız şekilde kirmege tırışqanda" yaqalağanını bildire.
Rusiye Fedaral telükesizlik hızmeti mahkümniñ adını ve soyadını bildirmey, amma Rusiyeniñ Aqmescit mahkemesiniñ saytında haber etilgeni kibi, sentâbrniñ 2-ne RF Cinayet qanunnamesiniñ 208 maddesiniñ 2-nci qısmına binaen qabaatlanğan Ümerov Ayder Osmaniviçke üküm ilân etilmek kerek edi.
Ayder Ümerovğa ükümni ukrayina prokuraturası tarafından cenk adetlerini ve qanunlarını bozuvda qabaatlanğan sabıq ukrayin mahkemecisi Mihail Belousov çıqarğan.
Bu yılnıñ iyün ayında "QırımSOS" aq qoruyıcı teşkilâtı Ayder Ümerovnıñ Rusiye arbiyleri tarafından işğal etilgen Herson vilâyetinde tutıp esir etilgenini haber etken edi.
Aq qoruyıcılarnıñ malümatına köre, Rusiye Ukrayinağa qarşı büyük istilânı başlağan soñ işğal etilgen topraqlarda Rusiye quvetçileri tarafından ukrayin vatnperverleriniñ, göñülliliyerniñ, cemaat faalleriniñ, jurnalistleriniñ, ATO/OOS veteranlarınıñ tutıp esir etilüv alları sıqlaşqan.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
