Rusiye kontrolindeki Aqmescitniñ Kiyev rayon mahkemesi qırımtatar blogeri Nariman Memedeminovnıñ dava malümatlarını ögrenüv müddetini aprelniñ 23-ne qadar sıñırladı, dep bildire Qırım.Aqiqat mühbiri.
Dava malümatlarını ögrenüv müddetini sıñırlamaq muracaatı qabaatlayıcı taraftan berilgen edi. Tahqiqatçı Nariman Memedeminovnı dava malümatlarınen tanış olğanda aprelniñ 19-na qadar sıñırlamağa rica etken edi.
İmaye tarafı ise oturışuvnıñ aprelniñ 24-ne avuştırılmasını rica etti, çünki Rusiyeniñ Rostov-na-Donu şeerinde meşğul olacaq. Mahkeme imayeniñ bu muracaatını red etip, tahqiqatçınıñ muracaatını qanaatlendirip, Nariman Memedeminovnıñ dava malümatını ögrenüv vaqtını aprelniñ 23-ne qadar qısmen sıñırladı.
Rusiye kontrolindeki Qırım Yuqarı mahkemesi aprelniñ 10-nda Nariman Memedeminovnıñ tevqif müddetini uzatuv qararına qarşı imaye bergen temyiz arizasını red etti. O, mayısnıñ 16-na qadar SİZOda qalacaq.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
