Rusiye nezaretindeki Aqmescitniñ Kyiv rayon mahkemesi üçünci Bağçasaray "Hizb ut-Tahrir davası"nıñ iştirakçisi, cemaat jurnalisti Amet Süleymanovnıñ ev tevqifiniñ avgustnıñ 9-ınace sozdı. Bunı "Qırım birdemligi"ne advokat Lilâ Gemeci haber etti.
O qayd etti ki, bu kün daa bir mahkeme oturışı oldı ve Federal cezalarnıicra etüv hızmetiniñ reberine, Süleymanov er ay ekimni ziyaret etmege kerek olğanını añlattılar.
Bundan ğayrı, advokatnıñ aytqanına köre, imaye tarafı operativ-qıdıruv tedbiri devamında tutulıp alınğan audio yazısınıñ psihilogik ve til ekspertizanıñ tayin etilmesi aqqında qarar ile tanış oldı. İmayeciniñ sözlerine köre, 2017-nci yılda üçünci Bağçasaray "Hizb ut-Tahrir davası"nıñ iştirakçileri ve başqa Bağçasaray sakinleri toplanğan camide diñleme yapıldı.
Daa evel Amet Süleymanovnıñ ev tevqifine yiberdiler. Onıñ advokatı bunıñ sebebi Süleymanov ağır hasta olğanıdır dey.
Martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Onıñ malümatına köre, tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
