Kreml nezaretindeki Qırım Yuqarı Mahkemesi, ekinci Bağçasaray "Hizb ut-Tahrir davası"nıñ iştirakçisi Seyran Saliyevniñ apis müddetini eki ayğa uzattı. Seyran Saliyev, Server Zekiryayev, Marlen Asanov ve Memet Belâlov SİZOda avgust 9-ınace tutulacaq. Bu aqta Qırım.Aqiqat mühbirine advokat Mammet Mambetov bildiri.
“Er şey er vaqıt kibi: oturış qapalı şekilde keçirildi, açıq oturış aqqında muracaat lâğu etildi, Seyran Saliyevni qafesten çıqarılmasına muracaat lâğu etildi. Sıñırlav tedbiri eki ayğa - avgust 9-ınace uzatıldı”, - dep ikâye etti o.
Tevqifniñ apiste uzatılmasınıñ sebebini, qabaatlanğanlar alâ daa dava malümatınen tanışa, dep añlatalar.
“Mantıqqa iç uymay. Yani mahkeme, Seyran Saliyev ev tevqifinde dava malümatınen tanışmaycaq, dep tüşüne. Ve bundan ğayrı er vaqıtki argumentler: makemelengen saqlana bile, şaatlarnı qorquta bile ve delillerni yoq ete bile”, - dep añlattı Mammet Mambetov.
Advokat Seyran Saliyevge, qadını Mümine Saliyevanıñ memuriy taqibatı aqqında da aytıp berdi.
“E” Merkezi hadimleri onıñ qadınını taqip etkeni aqqında da laf etip oldıq. O pek muğaydı. Bu onen bağlı ve, belki de, böylece quvetçiler oña basqı yapmaq istey dep tüşüne”, - dep aytıp berdi Mambetov.
Daa Saliyev advokatınen musulmanlarğa Oraza bayramınen hayırlav mektübini yolladı.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
