Kreml nezaretindeki Qırım Yuqarı mahkemesi açlıq tutqan Vladimir Baluhnıñ ükmüni 5 yıl umumiy rejim koloniyasından 4 yıl ve 11 ayğa deñiştirdi, dep bildire Qırım.Aqiqat mühbiri.
Mahkeme imaye şikâyetini qanaatlendirmeli, amma «Vladimir Baluhnıñ müsbet hasiyetnamesini köz ögüne alıp», ükümni yımşattı.
Daa evel haber etilgeni kibi, Baluh vaqtınca tutuv izolâtorınıñ faaliyetini bozuv aqqında cinaiy işiniñ üküm şikâyetini baqqan Qırım mahkemesiniñ toplaşuvına ketirilmedi. Ukrain faali mahkemede video bağı vastasınen iştirak etmekten vazgeçip, kameradan çıqmadı.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
