Rusiyeniñ nezaretinde olğan Qırımnıñ Yuqarı mahkemesi noyabrniñ 23-nde advokat Edem Semedlâyevni qarşılağan daa eki faalniñ tevqif etilmesine berilgen istinaf şikâyetlerini red etti.
Zekirya Demirci ve Settar Settarov al-azırda 12 künlük tevqif müddetini muvaqqat tutuv izolâtorında keçireler.
Semedlâyevniñ aytıp bergenine köre, mahkemed mudafaa tarafı şu künü elda keçken şaatlarnıñ sorğuğa çekilmesini istegen. Bunı "Qırım birdemligi" cemaat birleşmesi haber etti.
"Şaatlarnıñ şaatlığı aynıdır, olarnı er angi davağa, er bir insanğa qoşmaq mümkün", - dedi imayeci.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
