Rusiyeniñ nezaretinde olğan Aqmescitniñ Merkeziy rayon mahkemesi qırımtatar faali Mustafa Bekirovğa «piyadelerge ve naqliyatqa keder» etkeni içün 10 biñ ruble para cezasını berdi. Bunı «Qırım birdemligi» cemaat birleşmesi haber etti.
Bekirov oktâbrniñ 25-nde mahkemede istinaf baqılmasında diñleyici kibi iştirak etkende yaqalandı.
Mahkeme mudafaa tarafınıñ protokolnı tizgen polis hadimleriniñ, şaatlarnıñ ve prokurornıñ çağırılması aqqında muracaatlarını red etti.
«Bu sefer qadı Bekirovnı RF Memuriy uquq bozmalar qanunnamesiniñ 20.2 maddesine binaen qabaatlı tanımağa qarar etti ve 10 biñ ruble para cezasını berdi», – dep qoştılar birleşmede.
Evel, cinayet faaliyeti olmağanı içün oña qarşı açılğan dava toqtatılğan edi, amma qabaatlav tarafınıñ istinafından soñ davanı kene baqıp başladılar.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
