Kurort mevsimi devamında Qırım içme suvunen 60 fayızğa temin etilecek. Bu aqta Rusiye kütleviy haber vastalarına Rusiyege boysunğan Qırım parlamentiniñ ekologiya ve tabiat resursları komitetiniñ reisi Svetlana Şabelnıkova bildirdi.
"Yaqında Qırımnı temiz içme suvunen temin etmek içün kurort mevsimine azırlıq komitetiniñ toplaşuvını keçirdik. Bu mevsim yağanaqlar yağmağanına baqmadan, baar qarı ve yağanaqlar bizge biraz yardım etti, dep aytmaq isteyim. Suv resursları ile 60% temin etilecek", — dep bildirdi Şabelnıkova Qırımdaki "Sputnik" Rusiye radiosınıñ yayınında.
Bunıñen beraber, o, şunı da bildirdi ki, Qırımnıñ Cenübiy yalısı ve bütün kurort şeerleri "aqsamasız içme suvunen temin etilecek".
Qırım.Aqiqat mühbiri bildirgenine köre, Qırımda bugün eñ çoq suv tolu olğan Qarasuvbazar suv anbarınıñ suv seviyesi pek tez tüşe. Yaznıñ başlanmasınen Qırımnıñ Rusiye akimiyeti Cenübiy-Şarqiy Qırımnıñ ihtiyacları içün Qarasuvbazar suv anbarından Büyük-Qarasuv özenine suv taşuvını quvetleştirdi, bu ise suv anbarında suv seviyesi tez tüşmesine ketirdi.
Quralayda Qırımnıñ suv anbarları 11 million kubometr suvnı ğayıp etti. Tabiiy suv anbarlarınıñ umumiy miqdarı 126 million kubometrni teşkil ete, bu eñ yüksek miqdarnıñ 50%-ı. Teñeştirmek içün, tam bir yıl evelsi tolulığı 75% edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
