İlhaq etilgen Qırımda “Armânsk” kiriş-çıqış noqtasında Rusiye FSBsi, pasportında soyadını deñiştirip Qırımğa kirmege tırışqan Ukraina vatandaşını tuttı. Bu aqta müessise matbuat hızmetiniñ bildirgeninden “RİA Krım” haber agentligi yaza.
Qayd etilgeni kibi, pasport teşkerüvinde ve Dnepropetrovsk vilâyetiniñ sakini ile subette sıñırcılar, qadım pasport yazılarını aselet deñiştirgeni belli oldı. Onıñ aytqanına köre, bunı o, asabalıq resmiyleştirüvini qolaylaştırmaq niyetinen yaptı.
“Tafsilâtlı teşkerüv, Krasnodar ülkesiniñ sıñırcıları qadınnıñ Rusiyege kirmesini 2023 senesine qadar yasaqlağanını kösterdi”, - müessiseniñ matbuat hızmetine esaslanıp yaza matbuat.
Qadınnı Ukrainağa qaytardılar.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
