İşğal başlağanından berli Qırımnıñ 44 005 sakini Rusiye ordusına çağırıldı. Bundan da ğayrı, "askerlikten qaçınuv" maddesi ile tahminen 500 cinaiy dava açılğanı qayd etildi, dep bildirdi Ukraina prezidentiniñ Qırım Muhtar Cumhuriyetindeki temsilcisi Tamila Taşeva, müessiseniñ 2022-2023 seneleri faaliyetiniñ neticelerine bağışlanğan matbuat konferentsiyası vaqtında.
''Yarımada territoriyasında askerlikten qaçınğan insanlarğa qarşı 497 cinaiy dava açıldı. Asılında, 185 insan, yani yüzde 37-i, mesüliyetke çekildi... Yani insanlar qanunsız askerlikke çağırılmaqtan qaçmağa tırışalar ve bunıñ içün soñra mesüliyetke çekileler", - dep qayd etti o.
Bundan da ğayrı, prezidentniñ temsilciligi yarımadada topraq uçastkalarını ve cenaze topraqlarınıñ berilüvini taqip ete, büyük cenk başlağanından berli ne qadar adam celp etilgenini añlamaq içün.
''Şu cümleden, topraq uçastkalarınıñ berilmesini de nezaret ete bilemiz. Çünki anda işğal memuriyetniñ qararı ile askerlikke çağırılğan şahıs belli bir imtiyazlarğa ya da topraq uçastkalarına iddia ete bile. Böyleliknen, seferber etilgenlerniñ tahminiy sayısı aqqında ayta bilemiz", - dep qoştı Taşeva.
Ukrayina prezidentiniñ Qırım Muhtar Cumhuriyetindeki temsilciligi ilhaq etilgen Qırımda Ukrayinağa qarşı cenkniñ 750-den ziyade iştirakçisi bedava topraq uçastkalarını aldı, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
