Ukrayina prezidenti Volodımır Zelenskıy Qırım işğalden azat etilgen soñ anda turistik oazis degil de, Ukrayina flotu olacaq dep bildirdi.
"Qırım işğalden azat etilgen soñ anda turistik oazis olacağını beklemek yañlıştır. Birisine Qırımnı kene işğal etmesine izin bermemek içün anda flot olacaq. Bu qısqadan. Ukrayina Qırımnı mudafaa etecek", - dep bildirdi devlet başı.
Zelenskıynıñ sözlerine köre, bugün Qırımnıñ arbiy yolnen işğalden azat etilmesi aqqında açıq aytmaq aqqımız yoq.
Ukrayina lideri yañı Qırımnıñ işğalden azat etilmesi ve reintegratsiyası Strategiyasını ilân etti.
"Strategiya kelgende, o daa taqdim etilmegen. O em menim, em diger zenaatdaşlarımnıñ çıqışlarında qısmen bar edi. O em telükesizlik, em gumanitar, em ekologik, em iqtisadiy saalardan ibaret. Daa bu Qırımnıñ işğalden azat etilmesi ve adamlarımıznıñ qaytaruv meselesidir, Qırım ve andaki cemiyetniñ Ukrayinağa reintegratsiyasıdır", - dep qayd etti Zalenskıy.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Ukrayina Baş prokurorı Andriy Ko stin Qırımda 180-den çoq ukrayin siyasiy mabüsniñ tutulğanını bildirdi. 2022 senesi mart ayından başlap ise eñ az 370 kişi Rusiye ordusını "itibardan tüşürüv" içün memuriy mesüliyetke celp etilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
