Ukrayina, yalıñız devletniñ topraq bütünliginiñ 1991 senesinde belgilengen sıñırlarda ğayrıdan tiklenilüvini Rusiyege qarşı cenkte ğalebe kibi sayacaq. Bunı CNN-ge intervyü berir eken Ukrayina devlet başı Volodımır Zelenskıy bildirdi.
Ukrayinanıñ bütün küçleri cenüp ve şarqtaki topraqlarnıñ qaytarılmasına qoyulğanına baqmadan, prezident "devletniñ soñ maqsadı Qırımnıñ azat etilüvi" olğanını qayd etti.
"Ukrayinanı Qırımsız tasavur ete bilemeymiz. Ve Qırım Rusiye işğali altında qalğance cenk bitmez", - dep bildirdi o.
Zelenskıy, Qırımsız bir barışıqnıñ ola bilecegi stsenariy barmı yoqmı sualge şöyle cevap berdi: "O zaman bu ğalebe olmaycaq".
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirgen edi.
Ukrayina Mudafaa nazirligi Baş istihbarat idaresiniñ reberi Kırılo Budanov Ukrayina Silâlı quvetleriniñ qarşı ücümine azırlıq «planğa köre kete», amma yerine ketirüv planlarını aydınlatmaycaq, dep bildirgen edi.
Qırımnıñ Rusiye yolbaşçısı Sergey Aksönov Ukrayina istihkam ve mudafaa sayesinde yarımadanı işğalden qurtarıp olamaycaq, dep aytqan edi.
Mayısnıñ başında Baş istihbarat idaresiniñ vekili Andriy Yusov Qırımda Rusiye memuriyetleriniñ temsilcileri Rusiye işğal etken yarımadanı terk ete, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
