Kyivde dekabrniñ 13-nde «Qırım inciri» edebiyat yarışınıñ ğalipleri aynı adı olğan edebiy-bediiy festival çerçivesinde mukâfatlandırılacaq.
Festival üç kün devam etecek – dekabrniñ 13-nden 15-ne qadar.
«Dekabrniñ 14-nde ve 15-nde edebiyat mevzusında munaqaşalar olacaq ve yarış iştirakçi laureatlarınıñ eserleri oqulacaq», – dep aytıla «Qırım eviniñ» haberinde.
Teşkilâtçılarnıñ malümatına köre, «Qırım inciri» yarışı finalistleriniñ qısqa cedveli dekabrniñ 1-ne qadar aydınlatılacaq. Daa evel 2019 senesi «Qırım inciri» ekinci edebiyat yarışında iştirak etken 125 müellif arasında eki qırımlı siyasiy mabüsniñ – Server Mustafayev ve Osman Arifmemetovnıñ – eserleri bar, dep haber etilgen edi.
«Qırım inciri» birinci yazıcı yarışı 2018 senesi yazda başlağan edi. İşler oktâbrniñ 31-ne qadar qabul etildi. Yarışqa bütün Ukrainadan altı nominatsiyada 135 müellifniñ 244 işi keldi: «şiiriyet», «qırımtatar tilinde nesir», «ukrain tilinde nesir», «tercime» ve «qadın baqışı».
«Qırım inciri» ukrain-qırımtatar cıyıntığı Kyivdeki «Kitap arsenalında» taqdim etilgen edi.
