Link açıqlığı

Saatnıñ esas haberi

«Qırım ilhaqı – halqara telükesizlik içün doğru bir işaret». AB Rusiyege talaplarını aydınlattı


Federica Mogherini. Arhiv fotoresimi
Federica Mogherini. Arhiv fotoresimi

«Rusiyeniñ Qırım Muhtar Cumhuriyeti ve Aqyarnıñ qanunsız ilhaqınıñ beş yılından soñ» Avropa Birligi Ukrainanıñ mustaqilligi ve topraq bütünligine qoltutmağa devam ete.

Bu aqta Avropa Birliginiñ tış işler vekili Federika Mogerininiñ beyanatında aytıla.

«Avropa Birligi Rusiye tarafından halqara uquqnıñ bozuluvını tanımay ve takbih etmege devam ete: Qırım ilhaqı halqara telükesizlik içün doğru bir işaret olıp qala», – dep qayd etti Mogerini.

Beyanatta aytılğanına köre, Avropa Birligi BM aza devletlerini BM Baş assambleyasınıñ 68/262 rezolütsiyasına istinaden ilhaqnıñ tanılmaması boyunca tedbirlerni baqmasına çağıra.

«Rusiye tarafından halqara uquqnıñ bozulması Keriç boğazı ve Azaq deñizindeki kerginlikni arttırdı. 2018 senesi noyabrniñ 25-nde Rusiyeniñ Ukrainağa qarşı sebepsiz küç qullanuvı Qırım yarımadasınıñ qanunsız ilhaqınıñ regional istiqrar içün menfiy aqibetlerini hatırlata», – dep qayd etti AB vekili.

AB, Rusiyeni «Keriçte qanunsız zapt etilgen ukrainalı deñiz askerleri, gemi ve donatmalarnı acele azat etmesine, azat etilgenine qadar ise olarnıñ uquqiy temsilcilik ve konsullıq organları aqlarına sayğı köstermesine ve yaralanğanlarğa kerekli tibbiy yardım köstermesine» çağıra.

Mogerininiñ aytqanına köre, Avropa Birligi Ukrainanıñ razılığ olmağanda Keriç köprüniñ qurulmasını takbih ete ve Rusiye halqara uquqqa uyğun bir şekilde bütün gemilerniñ Keriç boğazından Azaq deñizine maniasız ve serbest keçişini temin etecegini bekley.

Bundan ğayrı, Mogerini, AB Rusiyeniñ Qırım yarımadasında saylavlar keçirgenini tanımay, dep qayd etti.

Avropa Birligi ukrainalı siyasiy mabüsler Oleg Sentsov, Edem Bekirov, Oleksandr Kolçenko, Mıkola Semena, Volodımır Baluh, Emir-Üsein Kuku ve Qırım yarımadasında tutulıp, halqara uquqqa zıt bir şekilde üküm etilgen er kesni acele azat etmege kene talap ete.

Bundan evel Çeh Cumhuriyeti Tış işler nazirligi Rusiye işğal etken Qırımnı Ukrainanıñ bir parçası olaraq saymağa devam etkenini bildirdi.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG