Qırım işğalinden soñ yarımadada ukrayin tili tasil sistemasından çıqarıldı, tasil esnası ise "Rusiye teşviqatınıñ aleti" oldı. Bu aqta "İşğal etilgen Qırımda devlet tilinde tasil almaq aqqınıñ bozuluvı" mevzusında tögerek masa vaqtında Ukrayina prezidentiniñ QMC daimiy vekiliniñ muavini Denis Çistikov bildirdi.
Onıñ aytqanına köre, Rusiye akimiyetiniñ böyle siyaseti ukrayinler ve qırımtatarlarğa nisbeten ayırımğa sebep oldı, bu BM Halqara mahkemesiniñ 2024 senesi yanvarniñ 31-nde çıqarğan qararınen tasdıqlandı.
"Ukrayin tili ve medeniyeti yarımadadan çıqarıldı. İşğalci akimiyet tasilni tarihnı bozmaq ve istilâcı devletke sadıqlıqnı şekillendirmek içün balalıqtan qullana", — dep bildirdi Çistikov.
Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini aytqanı kibi, Qırımnıñ Rusiye akimiyeti oquv programmalarınıñ mündericesini deñiştirmekten ğayrı yarımadada Ukrayinağa menfiy munasebetniñ propagandası ve militarizmniñ terbiyelenmesine doğrultılğan teşebbüslerni de kirsete.
"Rusiye qırımlılar içün Ukrayinanıñ ve qırımtatar halqınıñ tarihı yoq etilgen, Rusiyeniñ Qırımdaki rolü ise bozulğan alternativ kerçekni yaratmağa tırışa", — dep qoştı Çistikov.
Bundan evel Qırım ukrayinleri Regional şurasınıñ vekili, "Gumanitar siyaseti" gruppasınıñ koordinatorı "Qırım platforması" Ekspert ağınıñ koordinatorı Andriy Şçekun ilhaqnıñ başından berli Qırımda 600-den ziyade ukrayin sınıfı ve 7 mektep yoq etilgenini bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
