Rusiye idaresi astındaki Qırım İçtimaiy palatasınıñ başı Grigoriy İoffe COVID-19 hastaları tedaviylev keçken 7-nci hastahanede öldi. Mk.ru onıñ muavini Aleksandr Formançuk haber etkenine köre, İoffede koronavirus ve pnevmoniya sebebinden ağırlaşuv olğan.
“Cuma künü pnevomoniyağa oğradı, onıñ üzerinde COVID-19 başlandı. Gece saat ekilerde hastahaneniñ reanimatsiya bölügine alındı, ekimler 40 daqqadan ziyade ömrü içün küreşti. Gece saat üçte Grigoriy Adolfoviç öldi”, – Formançuknıñ aytqanlarından “RİA Novosti Krım” alıntı ketire.
Noyabrniñ 17-nde İoffe ölgeni aqqında haber etildi. Biraz soñra malümat Qırımnıñ İçtimaiy palatası saytında peyda oldı. Aynı zamanda ölüm sebepleri aqqında iç bir şey haber etilmedi.
2020 senesi iyül ayında Grigoriy İoffe Qırım İçtimaiy palatasınıñ başı vazifesine üçünci kere saylandı.
Qırım İçtimaiy palata 2014 senesi iyün ayında teşkil etildi. Onıñ resmiy maqsadı - işğalci akimiyet ve yarımada sakinleri arasında işbirlikni temin etmektir.
Qırım işğal etilmezden evel İoffe Qırım MC Yuqarı Şurasınıñ mebusı edi. O, Ukraina Ceza Qanunnamesiniñ 111 maddesine binaen Devlet hanliginen qabaatlana.
