Qırım iş adamları narazılıqnı bildirip, Kiyevde «Qırım çadırını» yerleştirdiler

Qırım iş adamları narazılıqnı bildirip, Kiyevde Obolon yalı kenarında «Qırım çadırını» yerleştirdiler.

Mecburen köçip kelgenler ve iş adamlar ukrain akimiyetiniñ diqqatını işğal etilgen Qırımdan kelgen insanlarnıñ meselelerine celp etmege tırıştılar, dep bildire Qırım.Aqiqat mühbiri.

Aluşta iş adamı Vâçeslav Ostapkonıñ sözlerine köre, bugünki künden yalı kenarında «Qırım manzaraları ve itibarğa lâyıq olğan çeşit yerler ile güzel çadır peyda oldı».

Onıñ aytqanı kibi, böyle çadırnı Aluştada da qoyğan ediler, anda ise onı yerli «halq imayesi» darma-dağın etken edi.


«Al-azırda Qırımdan Kiyevge kelgen iş adamlarında ticaret ile oğraşmaq içün iç ir vesiqa yoq. Bizge vaqtınca vesiqasız çalışmağa ve qorantalarımıznı baqmağa imkân berilmesi içün akimiyetniñ diqqatını celp etmege tırışamız», – dedi Ostapko Qırım Aqiqat mühbirine.


İş adamlarnıñ sözlerine köre, «Qırım çadırında» 5-6 insan bulunacaq, umumen ise qırımlılarnıñ toplulığı 3 biñ insannı teşkil ete.