ICOMOS ukrain teşkilâtı Qırım işğaline baqmadan, Bağçasaraydaki Han sarayı UNESCO dünya mirası cedveline kirsetilsin dep çalışa.
Bunı oktâbrniñ 9-nda UNESCO Yadikırlıq ve diqqatqa lâyıq yerler meseleleri halqara şurasınıñ Ukraina milliy komitetiniñ (ICOMOS) icra müdiri Yelena Serdük Qırım.Aqiqat Radiosınıñ yayınında bildirdi.
Onıñ aytqanına köre, namzetke kösterilgen Bağçasaraydaki Han sarayı yoq etileyatqan qırımtatar milletiniñ medeniy anane delili ola, dep qayd etilecek.
«Bu sarayda olğan qırımtatar halqınıñ abideviy sanat şekilleri ve mimarcılıq şekilleriniñ özgünligi bunı isbatlay. Bu işniñ maqsadı tafsilâtlı bir malümat azırlamaq ve onı Dünya mirası merkezine ve hususan komitetke bermektir», – dep qayd etti Serdük.
Malüm olğanı kibi, Qırımdaki Rusiye akimiyeti qırımtatar faallerine Bağçasaraydaki Han sarayında keçirilgen sahte tamir işleriniñ sebebini aydınlatqan vesiqalarnı köstermege razı olmay.
Qırımnıñ Rusiye akimiyeti Bağçasaraydaki Han sarayında «qazağa qarşı ilk işlerni» keçirmege devam ete.
Ukraina medeniyet nazirligi bildire ki, bu işler sebebinden Han sarayınıñ baş binası yıqıla bile.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeridir. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
