Rusiye advokatı Nikolay Polozovnıñ fikirince, Qırım işğal altında qalğance Rusiye ve Ukraina arasında tutulğan şahıslarnı deñişim esnası soñsuz ola bile. Advokatnıñ qayd etkenine köre, yarımadada «yañı insanlar tutula ve apiske alına».
«Ukrainağa teslim etilgen siyasiy mabüs vatandaşlarnıñ sayısına baqmadan, Rusiye bu deñişim fondunı toldurmaq içün bütün imkânlarğa saip. Bugün 34 insannı berseler, yarın daa 60 kişini apiske ala bileler. Böyle olsa, bunıñ soñu olmaycaq», – dep ayttı o, Qırım.Aqiqatqa.
Polozovnıñ hatırlatqanına köre, sentâbrde olğan deñişimden soñ işğal etilgen Qırımda Rusiye quvetçileri eñ az dört Ukraina vatandaşını tuttı.
Onıñ qayd etkenine köre, prezident Volodımır Zelenskıynıñ Ofisi deñişim cedvellerini «sert bir gizlilik rejiminde» tasdıqlay.
«Elbette, zapt etilgen bütün Ukraina vatandaşlarınıñ Rusiye apishanelerinden Ukrainağa teslim etilmesini isteyim. Rusiye akimiyeti buña qarşılıq olaraq ne istey eken? Eñ büyük problem budır», – dep qayd etti advokat. Onıñ bildirgenine köre, Ukrainada olğan deñişim fondu eksile.
Daa evel Polozov Qırım.Aqiqatqa izaat berip, «Hizb ut-Tahrir davaları» boyunca Rusiye apishanelerinde tutulğan qırımtatarlarnıñ azat etilüvi ancaq Rusiye tarafı reberliginiñ siyasiy iradesi ve menfaatlarına bağlı, dedi. O, bu qırımlılarnı deñişim vaziyeti qıyın olğanını tanıdı.
Denisova, Rusiyede apiste tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar, olardan 80-den çoqu – qırımtatarlardır. Qırımtatar resurs merkeziniñ cedvelinde 86 qırımlı siyasiy mabüs bar.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola. Aq qorçalayıcılar ve advokatlar bu cinaiy davalarnı diniy sebeplerden taqip dep adlandıra. Bu davalarnıñ mabüsleri – din kütken musulmanlardır.
Rusiye kontrolindeki işğal etilgen Qırımnıñ insan aqları vekâletlisi Larisa Opanasük, Ukraina quvetçileri 41 qırımlını apiste tuta, dep bildirdi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
