Rusiye akimiyeti teşkil etken acılıqnıñ Qırım içün ayırılğan kvotası 50%-ğa toldurıldı, 300 insan oldı. Bu aqta «AVN-Tur» Qırım acılıq operatorınıñ reberi Artur Reşitov Moskvadaki Rusiye Acılıq missiyasınıñ toplaşuvında bildirdi, dep haber ete Kreml kontrolindeki Qırım ve Aqyar musulmanları diniy idaresiniñ matbuat hızmeti.
«Bugünki künde Qırım içün kvota (600 yer) 50%-ğa toldurıldı, Mekke ve Medinege acılıq yapacaqlarnıñ vesiqaları daa qabul etile. Biletlerniñ 80%-ı satın alındı, bundan ğayrı, musafirhanelerde yerler ayırtıldı. Al-azırda Rusiye Federatsiyasınıñ Tış işler nazirligi ile acılarnıñ pasportlaştıruvı muzakere etile, biometrik pasportlarnı tez vaqıtta aluv içün «yeşil ayatnıñ» teşkil etilmesi baqıla», – dep aytıla haberde.
Bundan ğayrı, Kreml kontrolindeki Qırım sağlıq nazirligi ile acılarnıñ aşılanması aqqında añlaşma tizildi. O, Ramazan ayından soñ başlanacaq, dep bildirdi QAMDİ matbuat hızmeti.
Acılıqqa iyülniñ 23-nde baracaqlar, avgustnıñ ekinci yarısında ise keri qaytacaqlar.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
