Qırım ve Herson vilâyetiniñ memuriy sıñırındaki «Çonğar» keçiş noqtasında martnıñ 3-nde yarımadanıñ Rusiye işğaliniñ yılına bağışlanğan aktsiya olıp keçti.
Qırımlı student Mihail ve Qırımtatar Milliy Meclisiniñ vekili Abmecit Suleymanov Ukraina ve qırımtatar bayraqlarını köterdiler.
Aktsiya vaqtında memuriy sıñırdan keçken vatandaşlarğa «Qırım – Ukrainadır» yazısınen bilezlikler ediye etildi, «Çonğar» keçiş noqtasındaki Memuriy hızmet merkezinde bala resimleri sergisi açıldı.
«Qırım Ukrainanıñ kün tertibinden çıqarılmağanını ve çıqarılmaycağını hatırlatmaq içün bugün mındamız ve bütün vaqtınca işğal etilgen topraqlarnıñ qaytması içün küreşecekmiz. Prezidentimiz Volodımır Zelenskıynıñ aytqanına köre, Qırımnıñ qaytarıluvı milliy ğayeniñ bir parçası ola», – dep qayd etti aktsiya vaqtında Herson vilâyeti devlet memuriyetiniñ yolbaşçısı Yuriy Gusev.
Geniçesk rayon devlet memuriyetiniñ reis muavini Gülnara Bekirova, 2014 senesi martnıñ 3-nde Çonğar sakinleri «Geniçesk rayonını qorumağa çıqqan birinci insanlar edi», dep hatırlattı.
«Geniçesk rayonı Ukraina bütünligini qorumağa ve Qırımğa qoltutmağa devam ete», – dep qayd etti Bekirova.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
