Qırımda 86 yaşındaki filolog, medeniyetşınas, professor Diana Berestovskaya vefat etti. Bunı Facebookta Qırımnıñ rusiyeli başı Sergey Aksönov haber etti.
1996 yılından başlap ve Qırımnıñ ilhaqına qadar Berestovskaya V.İ. Vernadskiy adına Tavriya milliy universitetiniñ Ukraina ve çetel medeniyet kafedrasınıñ reberi olıp çalıştı.
İlhaqtan soñ o Qırımda rusiye akimiyeti tarafından teşkil etilgen "V.İ. Vernadskiy adına Qırım federal universiteti"nde çalışmaqnı devam etti.
Berstovskaya 1934 senesi mayıs 24-ünde Voronej (Rusiye) şeerinde doğdı. Voronej universitetini bitirdi (1956 yıl). Ocalıq yaptı (1956-69 yıllar). Üyken oca (1969-75), felsefe kafedrasınıñ dotsenti (1976-90) olıp, ukrainaşınaslıq kafedrasınıñ professorı (1991-93) olıp çalıştı. Ukrain ve çetel medeniyetniñ meselelerini, Qırım, Şimaliy Qara deñiz yanınıñ medeniyetini ve medeniyet ara munasebetlerni ögrene edi.
2015 senesiniñ başında Rusiyeniñ Qırım akimiyeti yarımadada «federal universitet»niñ meydanğa ketirilmesini buyurdı. Oña bir qaç aliy oquv yurtu ve bu cümleden yoq etilgen Vernadskiy adına Tavriya milliy universiteti, Georgiyevskiy adına Qırım devlet tıbbiyet universiteti ve bir qaç diger ilmiy muessise kirdi. «Qırım federal universiteti»niñ strukturasına 13 umum tasil ve ilmiy muessise kire.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
