Link açıqlığı

Saatnıñ esas haberi

Qırım faali Marlen Mustafayev, onı izleyler dep ayta (+video)


Marlen Mustafayev
Marlen Mustafayev

Qırım faali Marlen Mustafayev, onı izleyler dep ayta.

Bu aqta o öz Facebook saifesinde yazdı.

“Üç kün devamında şübeli erifler meni izlegenini körem, olar maşna ile menim mikrorayonımda, soqağımda meni közete, bugün ise tükâna çıqqanda, olarnıñ artımdan ketkenini kördim, şimdi tükân içindem, maşna ise tışta, tükân yanında qaravullay”, - dep yazdı Facebook saifesinde faal.

Faal, onı izlegen eki maşnanı qayd etti dep bildire.

2018 senesi noyabr ayında Qırımda qırımtatar faali Marlen Mustafayevğa qarşı cinayet dava qapatıldı.

2017 senesi fevral ayında Marlen Mustafayevniñ evinde, “ekstremist timsaller”niñ numayış etilmesi sebebinden tintüv keçirilgen edi. Telükesizlik hadimleri Mustafayevniñ kompyüter ve bir qaç kitabını aldı.

Mustafayevge qol tutmağa on adam keldi, olar olıp keçken vaqialarnıñ videosını çekip, içtimaiy ağlarda yayınladı. O adamlarnıñ episi keççe yaqalanğan edi.

Daa soñra Mustafayev, “ekstremist teşkilâtlarnıñ timsalleriniñ numayışı ya da propagandası”nda qabaatlanıp 11 künge tevqif etildi, safdaşları ise - 5 künge. Faal 2017 senesi martnıñ 4-nde azat etildi.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG