Rusiyeniñ "Vladimirskiy tsentral" apishanesinde Rusiye Federatsiyasınıñ eki FSİN hadimi "Qırım musulmanları davası" boyunca Rusiye mahkemesi tarafından 15 yılğa üküm etilgen Aqmescitli qırımlı faalleri Asan Yanikovnı köteklediler.
Bu aqta "Qırım birdemligi" cemaat birleşmesine mabüsniñ qardaşı Fatime Yanikova bildirdi.
''Asan aşayt mallarını almaq içün ne vaqıt keçe bilecegini soradı, lâkin oña red ettiler. O, daa bir kere soramağa qarar berdi. Mütehassıs bunı begenmedi ve bekçilerge işaret berdi. Oña yaqınlaşıp, bütün küçünen başını betonğa eki kere urdılar'', - dep tarif etti Yanikova.
Onıñ aytqanına köre, urulğan soñ Asannıñ başı pek ağırdı. Yarım saattan soñ oña bir ekim keldi. O, ayaqlarını baqtı ve er şey yahşı olğanını ayttı.
"Asan oña yüzündeki yaralarnı köstere ve baş ağrısı olğanını ayta edi, amma o, sadece ayaqlarını baqıp ketti", - dep qoştı Fatime.
Yanikovnıñ aytqanına köre, apishanede video nezareti bar ve ücüm kameralarda qayd etildi. Onıñ qayd etkenine köre, o, qarşılıq köstermedi ve apishaneniñ hadimlerine provokatsiya yapmadı. Fatime Yanikova şunı da qoştı ki, "qardaşı pek sabırlı olsa da, o, olıp keçkenlerni aydınlatmağa istey, çünki bu apishanede onıñ dindaşları otura, ve köteklemelerniñ adiy bir şey olmasını istemey".
Asan Yanikov faal, apiske alınmazdan evel Qırımda siyasiy sebeplerden açılğan davalar boyunca mahkemelerge bara edi. 2017 senesi milliy ve diniy alâmetler boyunca taqiplerge qarşı narazılıq bildirerek, bir kişilik narazılıq aktsiyasına çıqtı. Yanikov SİZO-da siyasiy mabüslerge haber yollay edi.
2021 senesi yanvarniñ 18-nde Asana Yanikov ve ekinci Aqmescit "Hizb ut-Tahrir" davasınıñ diger figurantı Seitveli Seytabdiyevni Aqmescitten Rostov-na-Donu SİZOsına etap ettiler.
Martnıñ 27-nde Qırımda FSB, Rusiye İçki işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdiler. Umumen 24 insan yaqalandı, olarnıñ arasında vatandaş jurnalistleri Osman Arifmetov, Rustem Şeyhaliyev, Remzi Bekirov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
