Rusiyede mahküm etilgen qırımlı faal Vladlen Abdulkadırovnı 2023 senesi oktâbr ayından berli Lipetsk vilâyetiniñ Yelts apishanesinde kezintige cıqarmaylar, dep bildire ''Qırım birdemligi'' onıñ apayı Gülіzarğa atıf etip.
Qayd etilgenine köre, tüzetüv müessisesiniñ hadimleri Abdulkadırovğa ayaqqap bermegenker, bunıñ içün o, kezintige çıqıp olamay. Aynı zamanda apishaneniñ memuriyeti mabüslerge öz ayaqqabını ve urbalarını almağa yasaq etti.
''Yaqında qırımtatar işke çıqmağanı içün para cezasını aldı. Abdulkadırov apishane hadimlerine ekimlerniñ teşkerüvini beklegenini ayttı. Apishaneniñ memuriyeti bunı sebepsiz degil de, añlı red olaraq tanıdı ve qırımtatar içün biñ rublelik para cezasını belgiledi", - dep aytıla haberde.
O, uzun vaqıt devamında bel ağrısından şikâyet ete edi. Abdulkadırov apiske alınğan soñ sağlığı fenalaştı, dep haber ete "Qırım birdemligi".
"Ağrıdan o bir yerde çoq turıp olamay edi, sağ ayağı yaramay edi. Yeltsniñ şahsiy hastahanesinde MRT teşkerüvini keçirmege izin almağa qıyın oldı. Teşkerüv bel bölüginde burulış ve iltihap olğanını kösterdi", - dep tarif etti Gülzar Abdulkadırova.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
