«Qırım evi» dörtünci «Qırım inciri» şair, nesirci ve tercimanlar yarışına işlerni qabul etip başlağanını ilân etti.
«Qırım inciri» yazıcılar yarışı qırımtatar tili ve edebiyatınıñ inkişafına ve tarqaluvına yardım etmek, Ukraina edebiyatında Qırım ve qırımtatarlar mevzusını aktual yapmaq, eki medeniyetni bir-birine daa teren añlatmaq içün tercimelerniñ peyda oluvına yardım etmek içün keçirile», – dep aytıla haberde.
Teşkilâtçılarnıñ bildirgenine köre, eserlerni 2021 senesi oktâbrniñ 31-ne qadar yollamaq mümkün.
Yarış kategoriyalar:
- Qırım aqqında ukraince nesir;
- Qırımtatar tilinde nesir (mevzu sıñırları yoq);
- Qırım aqqında şiiriyet;
- Qırımtatar tilinde şiiriyet (mevzu sıñırları yoq);
- Bala edebiyatı – Qırım aqqında ukrain tilinde bala nesiri ya da şiiriy eser ya da er angi mevzuda qırımtatar tilinde nesir ya da şiiriyet;
- Bediiy eserniñ ukrainceden qırımtatarcağa ve aksine tercimesi.
İşlerniñ berilüvinen bağlı qaideler aqqında tafsilâtlıca «Qırım eviniñ» Facebook saifesinde yazılğan.
«Qırım inciri» ilk yazıcılar yarışı 2018 senesi yazda keçti. Bütün Ukrainadan 135 müelliften 244 iş keldi.
Bıltır Aqmescitteki ekinci «Hizb ut-Tahrir davasınıñ» mabüsi Osman Arifmemetov ve Bağçasaraydaki ekinci «Hizb ut-Tahrir davasınıñ» mabüsi Server Mustafayev «Qırım inciri» ekinci edebiyat yarışı çerçivesinde «Söz serbestligi» nominatsiyasında mukâfat alğanlar.
