«Qırım evi» Ukraina fotoressamları milliy birliginen beraber «Qırım ikâyeleri» halqara online fotoyarışını keçire.
Teşkilâtçılarınıñ malümatına köre, yarışta Qırımda çıqarılğan fotoresimler iştirak ete bile.
Yarışnıñ şartları böyle:
- Mevzu – Qırım hatırlavları;
- Bir müellifniñ iş sayısı – 1-den 3-ke qadar;
- Er bir işniñ bu fotoresimnen ya da olğan yernen bağlı ikâyesi olmalı (500 işaretke qadar);
- Mektüpte müellifniñ adı, yaşağan yeri, içtimaiy ağlardaki saife bağlantısı qayd etilmeli;
- Yüksek keyfiyetli fotoresimler qabul etile, eñ az 500 kb ve uzun tarafı 1900 piksel olmalı;
- İşler crimeanhousekyiv@gmail.com poçtasına, mevzusında «Foto yarışı» yazıp yollanmalı.
Fotoresimler aprelniñ 25-ne qadar qabul etile. Yarış neticeleri aprelniñ 30-nda ilân etilecek ve online foto sergisi taqdim etilecek.
Jüri azaları bir ğalipni ve 10 eñ yahşı işni saylaycaq, olar «Qırım eviniñ» resmiy saytında online foto sergisindk taqdim etilecek.
Ğalip diplom, hatıra bahşışı ve ukrain tilinde qırımtatar nesiri neşirleriniñ taqımını alacaq.
Ukraina medeniyet fondu «Qırım evi» ve «Ukraina institutınen» beraber 10 million ğrıvnâlıq Qırım medeniyetini populârlaştıruv leyhasına yarış ilân etkenler.
Bundan evel Kyivde «Qırım inciri» üçünci edebiy yarışınıñ neticeleri ilân etildi.
