Rusiye mahkemesi "Qırım dülberi 2022" Olga Valeyevanı "Çervona kalına" yırını icra etkeni içün 40 biñ ruble para cezasına mahküm etti, arqadaşını ise 10 künge tevqif etti. Bunı Qırımda Rusiye İİN idaresi bildire.
Olarnı rusiye ordusını "itibardan tüşürüv" (Rusiye Memuriy uquq bozmalar qannamesi 20.3.2) ve natsist timsallrini numayış etüv (Rusiye Memuriy uquq bozmalar qannamesi 20.3) ile qabaatladılar. Valeyevağa çağına yetmegen balaları olğanı içün para cezasını berdiler.
Qırımda Rusiye İİN Olga Valeyeva ve arqadaşınıñ afu videosını yayınladı .
"Onıñ milletçilik manası olğanını bilmedim ve tasavur ete bilemedim. Bu türküni icra etip bir de bir propaganda yaratmağa asla istemedim", - dey Valeyeva rusiye quvetçileriniñ videosında.
Bu Qırımda ukrayın yırlarınıñ icra etilüvi sebebinden ilk taqip degil.
Bu yıl avgust ayında Qırımdaki Rusiye mahkemesi Şçelkino şeerindeki «Krab» qavesinde YARMAK ukrayın reperiniñ «Dıke pole» yırını qoyğanı içün dicey Yuriy Radionovğa 40 biñ ruble para cezasını ve 10 kün apis cezasını berdi. Onıñ aytqanına köre, ukrayin yırını qave musafirlerinden biri sımarladı, onıñ mündericesini bilmey edi. Daa soñra Rusiye mahkemesi «Dıke polenı» sımarlağan Dmitriy Gaynğa 50 biñ ruble para cezasını berdi.
Soñra Rusiye kontrolindeki Bağçasaray rayon mahkemesi «Çervona kalına» yırı yanğırağan toy saipleri ve musafirlerini memuriy mesüliyetke çekti. Rusiye mahkemesi mezkür yırnı «Ukrayina milletçileriniñ uruş türküsi» dep adlandırdı. Berilgen malümatqa köre, umumen 6 insan memuriy mesüliyetke çekildi. Olarnıña adları ve soyadları aydınlatılmay. Mahkeme saytında Ahtem Gemeciniñ Rusiye ordusını «itibardan tüşürüv» ve «nefret ya da duşmanlıq doğuruv» maddelerine istinaden mesüliyetke çeküv aqqında haber etile. Telegram kanalları Gemecini toy çalğıcısı dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
