Taraq Taş (Daçnoye) köyüniñ Acı-Bey Camisi Sudaqtan üç kilometr mesafede yerleşti. O, köyniñ eñ emiyetli mimarcılıq variyeti sayıla. Cami XVIII asırnıñ soñunda quruldı ve 1930-ıncı yıllarğa qadar qullanıldı.
İnsanlar, cami yanında çeşme bar edi, dep ayta. Suv keramik borularnen Ay-Georgiy dağınıñ çoqraqlarından berile edi. Suv borusını Birinci cian cenki vaqtında avstriya-macar arbiy esirleri qoyğan edi.
Köyde bayağı yaşağanlarnıñ aytqanına köre, caminiñ şarqında musulman mezarlığı bar edi. 1930-ıncı yıllarda bina qapatıldı ve boş qaldı. 1939 senesi minaresi yıqtırıldı, XX asırnıñ 40-ıncı yıllarnıñ soñunda ise çeşme baqılmay qaldı. İslâm dinini kütken qırımtatarlar sürgün etilgen soñ, cami binasını yataqhane olaraq qullanğanlar.
1990 yıllarnıñ başında qırımtatar halqı yarımadağa kütleviy şekilde qaytıp başlağan soñ camige diniy bina statusı qaytarıldı. Yerli musulman cemiyeti onı yavaş-yavaş ğayrıdan tiklep başladı. Bir qaç yıldan soñ dülber minare quruldı. Camide alâ daa çeşit işler yapıla. Er cuma künü cuma namazı qılına.
Sudaq civarındaki Acı-Bey Camini fotoresimlerde körmeñiz mümkün.
Facebook Forum