Türkiyeniñ kurort şeeri olğan Alaniyada halqara sanat festivallerinden birinde Qırım qomşu Rusiyeniñ bir parçası olaraq kösterilgen eykel taqdim etilgen edi. Ukraina TİN muracaat etkkn soñ yañlış haritanı aldılar. Bu aqta Ukraina Tış işler naziriniñ birinci muavini Emine Ceppar öz Facebook saifesinde yazdı.
«Ukrainanıñ Antalyadaki konsulı Emir Rustamov martnıñ 3-nde Alaniyanı ziyaret etti ve şeer başı Adem Murat Yücelge muracaat etip yañlış haritanıñ alınmasını istedi. Türkiye ortaqlarımızğa pek tez rektsiyası içün minnetdarmız. Endi sanat siyasiy tesir vastasına çevirilmegen ve acayip Alaniya şeeriniñ sakinleri ve musafirleriniñ başını RF topraqları aqqaında yañlış fikirlernen aylandırmay. Qırım bu Ukrainadır!» – dep qayd etti o.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
