Qomşu Rusiyeniñ Rostov vilâyetiniñ Bagayev rayon mahkemesi iyül 29-ında Qırım blogeri, cemaat jurnalisti Nariman Memedeminovnıñ şartlı olaraq apisten boşatılması aqqında imayeniñ muracaatını baqacaq. Bunı advokat Edem Semedlâyevge atıf etip "Qırım birdemligi" birleşmesi bildirdi.
"SİZOda ve yerleşme koloniyasında bulunğan vaqtında Nariman Memedeminovnıñ cezaları olmadı. Onıñ şartlı olaraq apisten boşatılması aqqı bar. Üküm amelge keçken soñ, biz birden muracaat ile mahkenmege bardıq. Tecribemizge köre, terrorcılıqnen bağlı maddeler boyunca maküm etilgenler boyunca böyle muracaatlarnı qanaatlendirmeyler, amma Narimannen bu aqnı qullanmağa qararına keldik", - aytıp berdi advokat.
İyünniñ başında Memedeminovnı Rostov vilâyetiniñ Sadkovskiy qasabasındaki yerleşme koloniyağa etap ettiler.
2019 senesi oktâbr ayında mahkeme Memedeminovnı yerleşme koloniyasında 2,5 yıllıq apis cezasına maküm etti. Memedeminovnıñ imayesi İnsan aqları boyunca Avropa mahkemesinde dava açmaq niyeti aqqında bildirdi.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
