Apiste tutulğan Bağçasaraydaki «Hizb ut-Tahrir davasınıñ» mabüsi, «Qırım birdemliginiñ» koordinatorı Server Mustafayevni psihiatrik hastahanege avuştıralar. Bu aqta qırımlı uquqçı Lilâ Gemeci bildire.
Onıñ malümatına köre, Mustafayevniñ advokatı Sergey Legostov bu malümatnı daa tasdıqlap olamay.
Qırım.Aqiqat imayeciniñ izaatlarını almağa tırışa.
Gemeciniñ fikirince, Rusiye uquq qoruyıcılarınıñ bu areketleri «tahmin etilgen edi», çünki bir ay evelsi Server Mustafayev «mahkeme-psihiatrik ekspertiza keçmesinden» vazgeçti.
«O (Mustafayev – QA) dey ki, bu ekspertizanıñ maqsadı tirenüv iradesini yoq etmek, onı aşalamaqtır», – dep qayd etti Gemeci Facebooktaki video muracaatında.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Dekabr ayında Aqmescitniñ Rusiye mahkemesi Mustafayev ve Smailovnıñ apis müddetini eki ayğa uzattı. Olar 2019 senesi fevralniñ 9-na qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
