"Qırım birdemligi" cemaat birleşmesiniñ faali Memet Belâlovnı Rusiyeniñ Velikiy Novgoroddaki 9-ncı tüzetüv cezahanesine ketirgenler. Bunı birleşmege onıñ ömür arqadaşı Ediye Belâlova haber etti.
Onıñ sözlerine köre, aqayınen sentâbrniñ 24-nde laf etken.
Ediye Belâlovanıñ sözlerine köre, Ufa SİZO-sından Başkortostan cezahanesine etap etilgen soñ olar çoq vaqıt Memetniñ bulunğan yerini bilmegenler. Bir ay devamında onı bir izolâtordan diger izolâtorğa avuştırıp turğanlar.
Velikiy Novgorodda Belâlov 6 kün SİZO-da keçirgen, soñra onı cezahanege etap etkenler. Cezahanede şahsiy şeylerini tutıp alğanlar ve apishane içün urbalar bergenler. 20 kün devamında o karantinde olacaq.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutıp alğan edi.
FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
