Berilgen malümatqa köre, uçaqlarnıñ episi yoq etildi ya da toqtatıldı. Bundan da ğayrı, bir uçucısız uçaq RF Krasnodar ülkesiniñ üzerinde yoq etildi.
Muarririyetniñ Rusiye akimiyetiniñ beyanatlarına dair delilleri yoq.
Ücüm yerli vaqıtnen saat 23:00 başlandı. Onıñ içün Keriç köprü qapatıldı, Qırım pablikleri Keriç boğazı rayonındaki patlavlar aqqında yaza ediler, bunı "Ava mudafaası işi" dep adlandıra ediler.
İçtimaiy ağlarnıñ qullanıcıları Aqyar ve Novorossiysk rayonlarında patlavlar aqqında haber ete. Saqnıñ Rusiye memuriyetiniñ yolbaşçısı Aleksandr Ovdiyenko Saqnıñ yalısında Yevpatoriyağa yapılğan ücüm aqqında bildire edi.
Aqyarnıñ Rusiye yolbaşçısı Aqyar universitetiniñ binası yanında raketa tüşkenini bildirdi. Qara özen köyünde raketanıñ bir qısmı özenge tüşti, onı yoq etmek içün poligonğa alıp ketecekler. Bu sebepten 47 ev tahliye etile.
Cumaaqşamı künü Qırım.Aqiqat mühbiri bildirdi ki, Aqyarda ava telükesi ilân etilgen soñ 10-ğa yaqın patlav eşitildi. Şeerniñ rusiyeli başı Mihail Razvojayev, "bir qaç ava maqsadı urulğanını" bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
