"Qırım" batalyonınıñ komandanı Nariman Belâlov (İsa Akayev) "Yararlıq içün" III dereceli nişan ile mukâfatlandı. Bunı Ukrayina prezidentiniñ Qırım MC-deki temsilciliginde bildirdiler.
"Qırımlı Nariman Bilâlov (İsa Akayev) muvaqqat işğal etilgen Qırımnı terk etip, 2014 senesi "Qırım" göñülliler batalyonınıñ terkibinde Donetsk ve Lugansk vilâyetlerinde Ukrayinanıñ mudafaasına ketkende istihbaratçı oldı. 2014 senesi "Qırım" batalyonı Savur-mogıla oğrunda semereli uruşlar alıp bardı ve duşmanğa cebeniñ diger qısımlarında da ciddiy darbeler endirdi. Arbiy areketlerde iştirak etken soñ ailesi ile beraber Vinnitsâ vilâyetinde yerleşti. Tınç yaşayışqa qayttı. Nariman bey qırımtatar halqınıñ milliy kimligini saqlap qalmaq içün çoq çalışa. O, muvaqqat köçkenlerge ve ATO ve OOS veteranlarına ertaraflı yardım içün teşkil etilgen "Vetan" teşkilâtınıñ reis muavinidir. İşğalciler onı qıdıruvğa ilân etkenleri içün Qırımğa barıp olamay", - dep haber ettiler temsilcilikte.
Qayd etilgeni kibi, Ukrayina prezidenti Volodımır Zelenskıy Bilâlovnı "Ukrayina ve onıñ halqı içün, faal yaşayış noqta-i nazarı içün, Ukrayina devletiniñ mudafaa qabiliyetiniñ quvetleştirilmesine qoşqan issesi içün, cesaret içün, fedakârlığı ve Ukrayina bütünligini imaye etkende arbiy areketler vaqtında ihtisaslığı içün" mukâfatladı.
Temisilcilikte qayd etkenleri kibi, fevralniñ 24-nde Rusiyeniñ Ukrayinağa keniş mıqyaslı istilâsı başlanğan soñ Bilâlov kene göñülli kibi cenkke ketti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
