Matbuat konferentsiyasında Ukrayina prezidentiniñ Qırım Muhtar Cumhuriyetindeki daimiy temsilcisi vazifelerini vaqtınca eda etken Ölğa Kurişko, vekâletli prezidentniñ muavini Denis Çistikov, 2022-2024 seneleri daimiy temsilcisi Tamila Taşeva iştirak etti. Tedbirni temsilcilikniñ informatsion temin etüv bölüginiñ reberi Yevğen Bondarenko alıp bardı etti.
Kurişkonıñ aytqanına köre, 2024 senesi devamında temsilcilik arbiy vaziyetniñ hususiy şaraitlerinde muntazam sürette çalışmağa devam etti. Müessiseniñ işi işğal etilgen Qırımğa nisbeten devlet siyasetini şekillendirmege ve yerine ketirmege yardım etken bir qaç müim yönelişke bağışlanğan edi:
- yarımadada vaziyetniñ monitoringi;
- uquqiy saada çalışuv, Qırım platforması çerçivesinde halqara ortaqlarnen işbirlik;
- İşğal etilgen Qırımda yaşağan Ukrayina vatandaşlarına yardım.
2024 senesinde başlatılğan yañı yöneliş, yaşlarnen çalışuv oldı.
Bundan da ğayrı, ilk sefer temsilcilik ve "Qırımnıñ küçlü olması içün ortaqlıq" Fondunıñ emrinen Kıyiv halqara içtimaiyat institutı 2024 senesi Qırımnıñ işğalden qurtarıluvı boyunca kompleks içtimaiyat tedqiqatını keçirdi. Mında, ukrayin haber alanında Qırım aqqında malümat yetmey, qıtaiy Ukrayina sakinleriniñ (şu cümleden qırımtatarlarnıñ) yarımada aqqında bilgisi az, dep aytıla.
Ukrayina prezidentiniñ Qırım Muhtar Cumhuriyetindeki temsilcisi vazifelerini vaqtınca eda etken Ölğa Kurişko müessise faaliyetiniñ esas irişmeleri ve yönelişlerini qayd etti. O, Qırım aqqında daa çoq aytmağa, işğalcilerniñ cinayetlerini ve ilhaq etilgen yarımadada qarşılıq areketiniñ faaliyetini aydınlatmağa çağırdı.
Temsilcilikniñ esabat tedbiri ukrayin ve ecnebiy jurnalistlerniñ iştiragi ile keçti.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
