Qırım.Aqiqat jurnalistleri yaz başından berli Qırımdaki qaysı Rusiye arbiy obyektlerine ücüm etilgenini ögrendi
Qırımdaki zarar körgen Rusiye arbiy obyektleriniñ haritasına köre, iyünniñ ilk künlerinde Panskoye gölünde 498 "Saturn" ya da "Protey" leyhasınıñ rusiyeli çekme maşinası zarar kördi.
2024 senesi iyün ayından bugünge qadar Qırımda eñ azından üç S-300 ZRK divizionı, dört S-400 ZRK qurulışı ve eki RLS qurulışı yoq etildi.
Bundan ğayrı, jurnalistler Miçurinovka köyü yanındaki arbiy obyektke ücüm, Vitino ve Çauda burnu rayonındaki poligonlarda yanğınlar, em de Balıqlava rayonında silâ anbarınıñ zarar körgenini qayd ettiler.
Amerika cenkni ögrenüv institutınıñ talilcileriniñ fikrince, Ukrayinanıñ Qırımdaki Rusiye obyektlerine endirgen darbeleri, F-16 qırıcıları alınmazdan evel, Rusiye Federatsiyasınıñ ava mudafaasını zayıflatmaq maqsadınen yapıldı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
