Dekabr 4-ünde Keriçte bulunğan Qırım.Aqiqat jurnalistleri, Qırım yalısı yanında FSB zapt etken ve sanki ğayıp olğan “Nikopol” ve “Berdânsk” ukrain arbiy katerlerni taptı. Katerler, Keriçte, Rusiye FSB Devlet sıñır hızmeti nezaret etken, “Genmol” akvatoriyasında iskele divarı yanında buluna.
Daa evel Keriç saytlarınıñ birisinde “Genmol”da ukrain arbiy katerleri yoq olğanını aqqında malümat peyda oldı.
“Nikopol” ve “Berdânsk” arbiy katerlerni limanınıñ içine avuştırdılar. Olar, 2014 senesine qadar ukrain deñiz qaravulınıñ Keriç müfrezesine ait olğan mıntaqada, Qırım ilhaqından soñ ise bu yerde Rusiye FSB sıñırcılarınıñ müfrezeleri yerleşti.
Keriçni sarıp alğan tumanğa baqmadan, Qırım.Aqiqat jurnalistleri ukrain arbiy gemilerniñ süretini çekip oldı. Sürette maskirovka ağınen sarılğan kater nomeriniñ bir parçası körüne.
“Yañı Qapu” reyd buksiri aynı yerde, iskeleniñ soñuna yaqın tura.
Ukraina Arbiy deñiz quvetleri bildirgenine köre, noyabr 25-te Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Bütün arbiylerni Moskovadaki "Lefortovo" apishanesine alıp kettiler.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve AQŞ tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
